ФОНДАЦИЈА „Славко Јаневски“: „Песот со тажен поглед“ од Оливера Николова е Роман на годината за 2019
На последниот состанок на Комисијата за доделување на наградата Роман на годината за 2019 година, во организација на Фондацијата за унапредување и промоција на културните вредности „Славко Јаневски“, со тајно гласање и со мнозинство гласови беше избран романот „Песот со тажен поглед“ од Оливера Николова.
Комисијата за наградата „Роман на годината“ за 2019 година беше во состав: Николина Андова Шопова (минатогодишна лауреатка и претседателка на Комисијата), Милован Стефановски (писател), Весна Мојсова Чепишевска (професорка на Универзитетот „Св. Кирил и Методиј“), Славе Ѓорѓо Димоски (писател) и Катерина Богоева (претставник на Фондацијата „Славко Јаневски“).
Во образложението за наградата Комисијата истакна дека „Песот со тажен поглед“ од Оливера Николова е роман што својата приказна ја темели на историски податоци, а фикцијата деликатно се испреплетува со фактите.
– Писмото на Николова е моќно, автентично и рафинирано. Таа и во овој роман покажува истенчено чувство за детали, кои го збогатуваат наративниот мозаик и кои суптилно исткајуваат мрежа од симболи. Смелата авторска идеја е успешно реализирана во творечки резултат со високи естетски вредности. Авторката умешно ја води приказната до самиот крај, одржувајќи ја компактноста на структурата, уверливоста на изградените ликови и книжевни ситуации, како и стилско-јазичната префинетост, стои во образложението за наградата.
Во најтесниот избор за наградата „Роман на годината“ влегоа пет романи: „Молчи со отворена уста“ од Снежана Младеновска Анѓелков („Или-Или“), „Пагански времиња“ од Драги Михајлоски („Просветно дело“), „Песот со тажен поглед“ од Оливера Николова („Матица македонска“), „Последните денови на Ханс“ од Михајло Свидерски („Или-Или“) и „Приказни за госпоѓица Сит“ од Билјана С. Црвенковска („Чудна шума“). На конкурсот пристигнаа 38 романи.
Наградата „Роман на годината“ ја доделува Фондацијата за унапредување и промоција на културните вредности „Славко Јаневски“, а годинава се доделува по 21. пат. Наградата, чиј генерален покровител е „Комерцијална банка“ АД Скопје, се состои од плакета, оригинална статуетка (дело на Сашо Саздов), како и паричен износ од 150.000 денари. Поради состојбата со коронавирусот, датумот на свеченото врачување на наградата, дополнително ќе биде одреден.
(Текстот е објавен во „Културен печат“ број 22, во печатеното издание на „Слободен печат“ на 14-15 март 2020)