Фондација „Славко Јаневски“: Четириесет дела конкурираат за „Роман на годината“
Фондацијата за унапредување и промоција на културните вредности „Славко Јаневски“, како организатор на Конкурсот за наградата „Роман на годината“, го објави комплетниот список на дела пристигнати на конкурсот. На 20 јануари се конституираше и жири-комисијата за доделување на наградата во состав: Оливера Николова (минатогодишна лауреатка и претседателка на Комисијата), Зоран Анчевски, Калина Малеска, Живко Грозданоски и Катерина Богоева (претставник на Фондацијата). Жири-комисијата ќе направи неколку селекции од романите во конкуренција, а конечната одлука за добитникот мора да ја донесе најдоцна до 15 март годинава. Наградата „Роман на годината“, чиј генерален покровител е „Комерцијална банка“ АД Скопје, ќе се додели по 22. пат.
Годинава на конкурсот пристигнаа дури 40 наслови, а наградениот роман ќе се закити со статуетка, плакета и награда во паричен износ од 150.000 денари. Во конкуренција за наградата за 2020 година се романите: „Мемоари за болниот ум. Зависност“ од Бошко Ангеловски (издание на „ПНВ Публикации“), „Лето во кое те нема“ – Петар Андоновски (Или – Или), „Шрапнел“ – Игор Анѓелков (Или – Или), „Колку убав погреб“ – Марјан Анѓеловски (самостојно издание), „Бричење петли“ – Владо Димовски (Арс Либрис), „Шардоне и шпагети карбонара“ – Марта Димитров (Антолог), „Вокабуларис“ – Ен Игма (Темплум), „Суво мастило“ – Владимир Илиевски (Македоника литера), „Асистола“ – Марија Јаневска (Три), „Мртвите знаат најдобро“ – Владо Јаневски (Арс Либрис), „Скриени желби, немирни патувања“ – Владимир Јанковски (Антолог), „Виенски гамбит“ – Анде Јанков (Антолог), „МоЛчИ и ТаНцУваЈ“ – Светлана Антиќ-Јовчевска (НУЦК „Трајко Прокопиев“ Куманово), „Денот кога не се разбудив“ – Моџо Килингтон (Арс Либрис), „Ши“ – Сашо Кокаланов (Или – Или), „Витезот и византијката“ – Кица Колбе (Или – Или), „Сфинга на гневот“ – Жарко Кујунџиски (Антолог), „Приказна за трите града“ – Митко Маџунков (Три), „Фантомско стапало“ – Блаже Миневски (Матица македонска), „Највисокото дно“ – Марија Митева (Полица), „Песја прељуба“ – Велко Неделковски (Арс Либрис), „И не биди млад мајмун“ – Велко Неделковски (Арс Либрис), „Воскресение“ – Мирче Нешовски, „Незадоволна“ – Ксенија Николова (Култура), „Турнеја“ – Сашо Огненовски (Бегемот), „На враќање“ – Фросина Пармаковска (Или – Или), „Името ми е Вивиен Ли“ – Горјан Петревски (Македонска реч), „Лазарка“ – Љупчо Петрески (Арс Либрис), „Туѓо тело“ – Владимир Плавевски (Арс Либрис), „Боксерот од Ново маало“ – Владимир Плавевски (Арс Либрис), „Изгорени души“ – Ѓорѓи Прчков (Графо Пром – Битола), „Курвински хроники“ – Александар Русјаков (Арс Либрис), „Тито – мојот претпоследен херој“ – Зоран Спасов Ѕоф, „Генералот и пеперутката“ – Луан Старова (МАНУ), „Јаничари“ – Луан Старова (Три), „Идол на ѕидот“ – Елена Филиповска (Сигмапрес), „Куќа над брановите“ – Билјана С. Црвенковска (Чудна шума), „Своја“ – Ирена Никола Чаушевска, „Христо Егеецот“ – Јован Џамбазоски (Матица македонска) и „Случајот Чернобог“ – Катерина Шошко (Антолог).
(Текстот е објавен во „Културен печат“ број 65, во печатеното издание на „Слободен печат“ на 23-24 јануари 2021)