Фон дер Лајен: Напредок во преговорите со В. Британија, до крајната линија има уште неколку метри
Во последните неколку дена има напредок во преговорите за идните односи меѓу Европската Унија (ЕУ) и Велика Британија, но и натаму останува уште многу да се направи, изјави претседателката на Европската комисија (ЕК), Урсула фон дер Лајен.
– По тешките недели со многу бавен напредок, во последните денови е постигнат поголем напредок во важните области. Тоа е добро, рече Фон дер Лајен на прес-конференција.
Меѓутоа, додаде таа, треба уште многу да се работи, особено во трите најтешки области – еднакви услови во пазарниот натпревар, пристап на европските рибари до британските води и начинот на решавање на споровите во идниот договор.
Претседателката на ЕК додаде дека во областа на еднаквите услови во пазарниот натпревар е постигнат напредок во однос на државната помош.
– Меѓутоа, до крајната линија останати се уште неколку метри, рече таа.