Книгата „Ретроспективи и перспективи во истражувањето на традицијата“ е дванаесетта книга на авторката Катерина Петровска-Кузманова. Во неа на 172 страници се поместени текстовите: Истражување на карневалите како културни перформанси и нивното место во популарната култура, Функцијата на звукот во обредите со маски, Аспекти на истражувањето на русалиските поворки во фолклорната традиција, Почетоците на етнографско-фолклористичките истражувања во Македонија и Трансформацијата на фолклорните мотиви во современата македонска драма, работени во последните десетина години. Проследувајќи ги различните аспекти на фолклорот од дијахрониски и од синхрониски агол во книгата се согледуваат некои аспекти, кои се однесуваат на ретроспективите и на перспективите на истражувачката практика во фолклористиката.

Освен на македонски јазик, текстовите во книгата се преведени и на англиски, со цел запознавање на пошироката јавност со вредностите на традицијата и современите истражувања во Македонија.

Преку текстовите поместени во книгата „Ретроспективи и перспективи во истражувањето на традицијата“ се настојува да се поврзе одредено минато со воспоставувањето нова традиција. Книгата е реализирана како проект од национален интерес во културата за 2020 година со поддршка од Министерството за култура.

(Текстот е објавен во „Културен печат“ број 55, во печатеното издание на „Слободен печат“ на 7-8 ноември 2020)