Флик: Не гледам назад во минатото, очекувам вжештена атмосфера во Скопје
Репрезентацијата на Германија ја оправда фаворитската улога во квалификациите и е многу блиску до обезбедување на ново учество на Светските првенства.
Токму в понеделник (20.45 часот) избраниците на селекторот Ханси Флик ќе се обидат со триумф и практично го заверат пласманот на Мундијалот во Катар следната година.
Четирикратниот светски шампион е свесен за единствениот пораз кој го доживеа во квалификациски циклус, токму од Македонија годинава во Дуизбург (1:2) што беше голем шок за нив.
Од друга страна, селекторот Флик не сака да гледа во минатото, туку само напред како да се обезбедат бодовите и се зацврстат на првата позиција на табелата.
– Атмосферата во Скопје ќе биде вжештена. Македонската репрезентација ќе биде целосно мотивирана. Тие сакаат да ги задржат шансите за пласман на СП и со победата која ја имаа на наш терен сега имаат поголема самодоверба.
Македонија знае како да игра фудбал, имаат искусни играчи во составот, затоа мораме да ги покажеме нашите сопствени квалитети и мислам дека тоа ќе биде одлучувачко.
Не гледам назад во минатото, ние сакаме само да ја имаме нашата филозофија на теренот, да бидеме обединети, да останеме активни. Сакаме да победиме и што е можно побрзо да го обезбедиме пласманот на Светското првенство – рече Флик, а пренесува „Ројтерс“.
Милевски: Против Германија пред сè тактички мора да бидеме на врвно ниво