Фондот за иновации и технолошки развој соопшти дека во рамки на јавниот повик „Креатон”, наменет за креирање дигитални алатки и решенија за справување со последиците од Ковид-19, до нив пристигнале вкупно 546 инцијативи.

Јавниот повик траеше 72 часа и ваквиот интерес е само показател за нивото на свест и желбата за придонес кај многу наши сограѓани, НВО и компании.

Од ФИТР наведоа дека иницијалните бројки покажуваат дека 57 отсто од иницијативите се поднесени од компании, здруженија или организации, а околу 43 проценти се поднесени од физички лица.

По првата фаза, како што наведоа од ФИТР, за сите предселектирани иницијативи ќе се определат 48 часа за изработка на детален план на активности и предлог буџет. Апликантите чии предлог проекти ќе бидат избрани во фазата на финална селекција ќе имаат обврска да подготват јавна презентација на предлогот пред Комисијата. Јавната презентација на решенијата и евалуацијата ќе се врши онлајн преку видео – конференциска врска. Предлозите ќе се оценуваат според степен на иновативност, рок и механизми за реализација, капацитет на проектниот тим и влијание.

Од Фондот информираат дека повикот е прв од нивните иницијативите за справување со последиците од корона вирусот.