Фондот за иновации објави нов јавен повик за микро, малите и средни фирми во земјава. Според соопштението одвоени се 5 милиони евра за оваа намена при што од буџетот се 3 милиони евра, додека Светска банка обезбеди 2 милиони евра.

Максималната сума за која компаниите може да аплицираат изнесува 350.000 евра.

Грантот за средните компании е 60% од износот, а пак грантот за микро и малите фирми е до 70% од износот за проектите. Самите апликанти се обврзуваат да го финансираат остатокот од сумата. Според ФИТР овој повик ќе трае до 15 мај.

За грантови преку Фондот за иновации објавени се и нови услови за аплицирање. Една од новините е обврската на корисниците на финансиска помош да враќаат пари во ФИТР. Имено, од кога ќе почнат да остваруват приходи од иновацијата за која што добиле грант, ќе треба по 5% од остварените приходи на годишно ниво да враќаат во ФИТР.

Таа обврска ја имаат 5 години од моментот кога ќе почнат да остваруваат приходи. При тоа вкупниот износ што се враќа не треба да надмине 120% од износот за кој што аплицирале.

Така ФИТР очекува да креира партнерски однос со компаниите.