Филозофскиот филмски фестивал своето 10-то издание го реализира онлајн. Со мото „Пролетни онлајн миграции“ од 21 до 31 мај околу 30 филмови и други фестивалски активности (видео излагања, средби, вебинар, онлајн концерт итн.) се достапни преку виртуелната киносала на платформата „Синесквер“.

На отворањето на фестивалот беше прикажан документарниот филм „Андреј Тарковски: Филмска молитва“, а следниот ден се одржа средба со режисерот Милчо Манчевски. Во програмата се застапени краткометражни, среднометражни и долгометражни филмски остварувања, а се реализира во соработка со Кинотека и со платформата „Синесквер“.

Во рамките на програмата на 10. Филозофски филмски фестивал, на 27 мај (среда), во 11.30 часот, ќе се одржи вебинар на тема: „Ковид-19 и состојбите во македонскиот филмскиот сектор“, каде што меѓу другото ќе се разговара за тоа како домашните и европските институции одговорија на ковид-кризата, каква е „новата нормала“ и реосмислувањето на филмската индустрија и како сакаме да го замислиме филмскиот сектор во иднина.

На вебинарот ќе учествуваат Бистра Георгиева, раководител на МЕДИА Деск МК, Анита Стојческа (Агенција за филм), Игор Иванов (режисер, ДФРМ/Манаки), Владимир Љ. Ангелов (Кинотека), Саша Станишиќ (Катавеј/ Синесквер), Стефан Палитов (режисер), Татјана Јаневска (Скопски филмски фестивал), Дарко Набаков (Македокс), Атанас Георгиев (продуцент) и Русе Арсов (МКЦ/Синедејс). Модератор на вебинарот ќе биде Ана Дишлиеска Митова.

(Текстот е објавен во „Културен печат“ број 32, во печатеното издание на „Слободен печат“ на 23-25 мај 2020)