Филмска копродукција: Прво снимање во време на ковид-19
По неколкумесечната стагнација, која беше предизвикана поради ковид-19, во Хрватска почна снимањето на филмот „Таја носеше црлена шамија“ (Nosila je rubac crleni), хрватско-македонска копродукција во режија на Горан Дукиќ. Филмот е во продукција на „Швенк“ од Хрватска, а македонски копродуцент е „Вертиго вижуал“ со поддршка од Агенцијата за филм.
Приказната, по сценарио на Сандра Антолиќ, го следи семоќниот и сезнајниот наратор Исус Христос, не помалку сезнајната тетка Анка и љубопитната прасица Беба, кои се главните ликови на оваа романтична рурална комедија со пеење, сместена во питомото Загорје во воените 90-ти на минатиот век.
Што се однесува до снимањето филмови на почвата на Македонија, Агенцијата за филм даде предлог-протокол за снимање филмови во услови на ковид-19 до Комисијата за заразни болести, за кој се чека одобрување.
(Текстот е објавен во „Културен печат“ број 38, во печатеното издание на „Слободен печат“ на 4-5 јули 2020)