Филмот „Некрстени денови“ на Иво Трајков е визуелно раскошна приказна
Проекцијата на филмот „Некрстени денови“ и разговорот со македонскиот режисер Иво Трајков предизвикаа голем интерес кај публиката на отворањето на 13. издание на Филозофскиот филмски фестивал, што се одржува од 2 до 9 јуни во Кинотеката во Скопје.
Македонската премиера на долгометражниот игран филм „Некрстени денови“ (интернационалниот наслов е „Piargy“) на еминентниот филмски режисер Иво Трајков се одржа на отворањето на 13. издание на Филозофскиот филмски фестивал, на 2 јуни во летното кино „Мирно лето“ на Кинотеката во Скопје.
Филмот е реализиран во словачко-македонско-чешка копродукција и досега има учествувано на голем број меѓународни филмски фестивали и е добитник на повеќе награди, меѓу другите и на фестивалите во Буенос Аирес, Брисел, Монтреал.
– Сакав премиерното прикажување во Македонија да биде нешто вонредно. Од тој поглед ми се чини дека и самата идеја за филозофски филмски фестивал е нешто уникатно и надвор од границите на Македонија. Филозофијата е присутна во секој филм како составен дел на животот. Во овој филм се појавуваат и некои теозофски аспекти – истакна режисерот Трајков по повод фестивалската премиера во разговор со публиката по проекцијата на филмот.
Визуелно раскошната приказна е базирана на краток расказ на словачкиот писател Франтишек Швантнер, чие творештво во словачката литература Трајков го смести во жанрот „магичен реализам“ и го спореди со приказните и значењето што Живко Чинго го има во македонската литература. Дури и посочи дека заслугата што добил покана да снима филм во Словачка ја има снимањето на неговиот македонски филм „Големата вода“, каде меѓу копродуцентите се појавува и Словачка.
Дејството во филмот „Некрстени денови“ се случува во малото планинско село Пиарџи непосредно пред почетокот на Втората светска војна. Во пролетта 1939 година селото е затрупано од снежна лавина само неколку дена откако се родил Антихристот.
Филмот импресионира со својата оригиналност и раритетност во пристапот на темата, која ги опфаќа љубовта, страста, надежта, гревот и казната. Преку брилијантна црно-бела фотографија Трајков суптилно и нетенденциозно ни доловува атмосфера на историска драма и ја претставува хипокризијата на моралот, религијата и патријархалната традиција во општеството.
Ќе потсетиме, Иво Трајков е македонски режисер, продуцент и сценарист кој живее во Чешка и предава на престижната филмска академија ФАМУ во Прага.