Зад затворени врати во Стопанската комора денеска се одржа средба на која присуствуваа членовите на македонската експертската група, претставници на другите комори и претставници од Министерството за надворешни работи кои утврдуваа како треба се одвиваат разговорите со нивните грчки колеги во поглед на заштитата на трговските марки и брендови, како и производите, што е дел од Договорот од Преспа.

– Ние се обидуваме да ги анимираме нив, затоа што дел од стопанствениците немаат доволно познавање и не сметаат дека тоа е нивно прашање, затоа што во Договорот стои дека деловните заедници се тие кои треба да ги разјаснат во крајна инстанца. Додека меѓународната група е тука да им помага тоа да биде во согласност со меѓународното право – вели претседателот на македонската група Ѓорѓи Филипов.

Во средината на јуни беше формирана меѓународната група на експерти составена од пет членови од нашата земја и пет од Грција, еден експерт од Светската организација за интелектуална сопственост и се очекуваат уште еден или двајца од Европскиот завод за интелектуална сопственост.

Групата во ваков состав досега има одржано само еден состанок, a следниот се очекува да биде до крајот на годината во Атина.

– Ние вршиме подготовки со нашите деловни заедници, а исто така мислам и грчката страна дека го прави истото, при што ќе се подготви „терен“ за разговор на деловните заедници. Во суштина разговорот околу трговските имиња, трговските марки и брендовите ќе се одвиваат меѓу деловните заедници, кои ќе си формираат свои групи, додека меѓународната група ќе служи да им ги посочи насоките и да им каже дали се во рамките на Договорот – изјави Филипов.

Според него, некои трговски марки и покрај тоа што се во согласност со меѓународното право, вршат конфузија на пазарот и затоа во интерес на стопанствениците од двете земји е тоа да биде решено. Тој додаде дека размената со Грција почна да расте и годинава е зголемена за околу 10 отсто.

– Во интерес на стопанствениците и на потрошувачите е да нема конфузија во врска со тоа дали купуваат производи од Грција или од Северна Македонија, додава тој.

– Во поглед на трговските марки, со името „Македонија“ и другите изведенки од него, ние имаме предност со тоа што сме единствената држава во светот што го има зборот „Македонија“ во своето име, но сепак во поглед на марките и трговските имиња, оние што треба да ги постигнат договорите се стопанските комори, бизнисмените. Во Македонија има околу 3.200 фирми што имаат во некаква форма „македонски“ во името , а во Грција околу 3.500, а Грција е наш трет трговски партнер според трговската размена, па очекувам дека бизнисите бргу ќе си ги најдат заедничките интереси. Досега се покажа дека тие (бизнисите) со поладна глава од новинарите и политичарите реагираа на прашањата што се отвораа во последно време околу трговските марки – објасни Филипов.

Тој вели дека стопанските субјекти и во Македонија и во Грција воопшто не реагирале сензационалистички на предлогот на премиерот Кирјакос Мицотакис за новата трговска марка, односно промотивниот маркетиншки слоган “Macedonia is GReat”. Стопанствениците имаат еден интерес, а тоа е да се зголеми продажбата и профитот, дециден е Филипов.