Филипче: Загрижува трендот на смртни случаи, не сакаме полни болници
Последниот тренд на зголемување на бројот на смртни случаи како последица на Ковид-19 е загрижувачки, признава министерот за здравство, Венко Филипче. За време на посетата на специјалната болница по гинекологија и акушерство „Мајка Тереза“ во Чаир, по повод завршување на проектот за гасификација на објектот, тој истакна дека се прават анализи од чии резултати ќе зависат и натамошните мерки што ќе бидат преземени.
– Не сакаме полни болници, а анализите ќе покажат на што се должи зголемениот број на смртни случаи и што ќе се преземе. За жал, превентивните мерки не се почитуваат. За жал има и млади починати. Дел од нив имаа сериозни коморбидитети што ја намалува шансата за добар исход. Станува збор за тешка болест која се манифестира во тешка клиничка форма. За сите се презема, сѐ. Веројатно ќе бидат презентирани уште пет починати во текот на денешниот ден“, рече Филипче.