Филипче: Целосен карантин не е решение, детално „чешлање“ на анкетните прашалници, па препорака на мерки

Министерот за здравство Венко Филипче, по вечерашната средба со градоначалнкот на Кочани, Николчо Илијев, најави дека детално ќе се анализираат податоците од анкетните прашалници за да се согледаат можните причини за огромниот пораст на бројот на позитивни на ковид-19. Целосен карантин, како што рече, не е вистинско решение, а единствен начин да се спречи ширењето на вирусот е сите поревносно да се придружуваат кон мерките.

– Денешниот број на новодијагностицирани во целата држава загрижува поради тоа што просекот е повисок во однос на претходните денови. Во таа смисла, Комисијата за заразни болести овој викенд детално ќе ги проверува анкетните прашалници, за да се утврди начинот на трансмисија во секоја општина или град во државата, па врз основа на тоа во наредните денови да бидеме подготвени да препорачаме мерки, согласно начинот на пренесување на вирусот. Тие мерки мора да бидат соодветни, ги најавивме на почетокот на септември, бевме свесни дека ни доаѓа есенски период во кој може да има зголемен број на дијагностицирани, што сега практично и се случува, истакна министерот Филипче.

На средбата со градоначалникот на Кочани се разговарало за високиот број на позитивни лица во општината во изминатите две недели, посебно за новите мини кластери во некои институции, текстилни фабрики, но и меѓу здравствените работници и вработените во градинките. Додаде дека не се размислува за повторно враќање на мерките за ограничено движење на граѓаните.

– Рестриктивните мерки, како и секаде во светот, дадоа резултат, а по нивното олабавување се појавија нови случаи. Тоа е доказ дека вирусот е тука и дека единствен начин да се запрат сите процеси, не само во нашата држава, е да се придржуваме кон заштитните мерки. Целосен карантин не е вистинско решение, затоа што кога и да се направи, по укинувањето повторно се соочуваме од зголемен број на случаи. Затоа апелирам до граѓаните уште поревносно да се придружуваат кон мерките, затоа што тоа е единствениот начин да се спречи ширењето на вирусот, рече Филипче.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот