Во очекувана пријателска атмосфера помина средбата меѓу двајцата шефови на дипломатииите на Турција и на Македонија, Хакан Фидан и Тимчо Муцински во Скопје. Гостинот од Турција ѝ посака успешна работа на новата македонска Влада и продлабочување на соработката и унапредувањето на односите на двете земји на политичко, економско, воено и на културно поле.

– Како Турција, изразуваме дека имаме интерес да потпишеме договор за формирање на виш стратешки совет за соработка. Турција има цел да се зголеми билатералниот трговски обем и ги поттикнуваме турските компании да помогнат во растот на земјава со свои инвестиции. Продолжуваме и со воената соработка, преку учество на заеднички вежби – изјави Фидан по средбата со Муцунски.

Тој нагласи дека за него Северна Македонија има посебно место и верува дека отоманското наследство е значаен дел од културното наследство на земјава, а отоманските споменици кои се реставрирани со турска помош придонесуваат за развој на туристичкиот потенцијал на земјата, па најави и соработка и на културно поле во таа област.

– Турската заедница во земјава силно нè поврзува. Во минатото многу наши браќа од турската и од другите заедници сега се наши државјани и живеат во Турција. Овие односи се моќни и ги поврзуваат нашите земји слично како Камениот мост на Скопје. Посакуваме да се развиваат односите помеѓу сите заедници и да се зачува оваа хармонија на Северна Македонија. Воедно бараме правата на турската заедница кои се засновани на закони да бидат негувани од страна на надлежните власти, а барањата за настава на мајчин јазик и инфраструктурните проекти ќе ги реализира новата влада. Очекуваме новата влада да има чувствителен пристап во однос на антитероризмот и борбата со ФЕТО, бидејќи ФЕТО не е само закана за Турција туку и во другите земји каде што е присутна. Очекуваме Северна Македонија да даде помоќен придонес во борбата против ФЕТО – рече Фидан.

Домаќинот, министерот за надворешни работи и надворешна трговија Тимчо Муцунски, за Турција нагласи дека е докажан пријател кој неодамна кога избувнаа шумските пожари прв покажа солидарност. Посетата на министерот Фидан е прва посета на странски министер за надворешни работи од неговото стапување на функцијата, а тоа, како што нагласи, е силна потврда за сè посилното стратешко партнерство.

– Традиционално добрите односи позитивно влијаат на економската соработка. Со Турција споделуваме заеднички ставови и за безбедносни и регионални прашања. Посебно го запознав со нашиот евроинтеграцискиот пат, со посебен акцент на тоа дека дека предвидливоста е многу важна – изјави Муцунски.

Од својата независност, посочи Муцунски, нашата држава можеше да се потпре на Турција како наш пријател и поддржувач за остварување на нашите стратешки цели и нагласи дека очекува во наредниот период да има редовни средби на високо ниво меѓу двете држави.

Двајцата министри разговарале и за состојбите во Украина и на Блискиот Исток, при што министерот Фидан ја нагласи потребата од итна интервенција на меѓународната заедница за мир на Блискиот исток, но и за смена на „виновникот“ израелскиот премиер Бенјамин Нетанјаху.

– Вандализимот во Газа продолжува и се шири кон Западниот Брег и главен виновник е Нетанјаху кој има деструктивен пристап и поставува нови услови за примирје. Задолжително да се запре Нетанјхаху, зошто ако останеме тивки на геноцидот, ќе излезе дека го поддржуваме – нагласи Фидан кој се заложи за мирно решавање на отворените прашања на Балканот, посебно косовското и случувањата во Босна каде исто така е засегнато тамошното турско малцинство.

Министерот Хакан денеска е на средби со претседателот на Владата, Христијан Мицкоски и претседателот на Собранието, Африм Гаши, како и со турски пратеници во македонското собрание, со лидерите на албански политички партии и со претставници на турската заедница во Северна Македонија.

Турскиот министер за надворешни работи денеска во официјална посета на Македонија