ФФМ да го почитува Законот за спорт
Клубови од првата и втората македонска фудбалска лига, поранешни судии и фудбалери како дел од Иницијативниот Одбор побара Законот за Спорт да биде имплементиран во работата на Фудбалската федерација на Македонија што значи и поголемо учество на клубовите во работата на Федерацијата.
– Сведоци сме во последно време на негодувања дека Статутот на ФФМ не е во согласност со Законот за спорт кој предвидува директно вклучување на клубовите во работата и одлучувањето на федерацијата. Ние сме тука затоа што сме загрижени поради тоа што оние кои инвестираат, вложуваат во фудбалот, а тоа се клубовите, немаат право да учествуваат и одлучуваат. Затоа ги повикуваме надлежните во државата доследно да го спроведат Законот за спорт и во ФФМ – изјави Игор Климпер, поранешен генерален секретар на ФФМ.
Иницијативата има поддршка и од поранешни репрезентативци.
– Тука сум во име на фудбалерите, на бивши и моментални репрезентативци, играчи во лигите. Сите сакаме ФФМ да работи на вистински начин, да бидат инволвирани луѓе во светот на фудбалот, а не да работат луѓе што немаат ништо лично со фудбалот. Ние ја поддржуваме оваа иницијатива – рече Бобан Грнчаров, поранешен македонски репрезентативец.
Иницијативата за промени во работата на ФФМ е подржана од 15 екипи од првата и втората лига: Победа, Брегалница Штип, Работнички, Беласица, Пелистер, Академија Пандев, Детонит јуниор, Кожув, Тиквеш, Плачковица, Каменица, Вардар Неготино, Скопје, Партизан и Борец.