Фестивалот на краток филм „Филмај“ ги објави добитниците на наградите

Фото-кино клуб „Козјак“ – Куманово ги објави добитниците на наградите од конкурсот на фестивалот на кратoк филм „Филмај“ 2022 во Куманово, соопштија од клубот.

Наградите се поделени во неколку категории: наградата „Лазар Ѓорѓевиќ“ за најдобра режија ја доби Самир Карахода за режијата на филмот „Изместено“ (Косово), наградата „Радислав Ристевски“ за најдобра фотографија/кинематографија е доделена на Владимир Самоиловски за неговата работа во филмот „Северен Пол“ (Македонија), наградата „Козјак“ за најдобро сценарио ја доби Фотис Зампетакис за филмот „Ангелос на Божиќ“ (Грција) и наградата за најдобар македонски филм е доделена на „Обичната Ели“, краток филм на режисерката Лавинија Софрониевска.

Новосоздадената награда за најдобар краток филм „Филмај“ е доделена на „Сама“ (Хрватска), во режија на Борна Зидариќ, според заедничка одлука на членови на фото-кино клуб „Козјак“ – Куманово.

Жирито го сочинуваа сценаристите и режисери Сезер Салихи и Косара Митиќ, како и Филип Илиевски, член на фото-кино клуб „Козјак“ – Куманово. Од „Козјак“ додадоа дека дополнително ќе ја објават целата листа со официјално селектирани филмови што ќе бидат прикажани на фестивалската вечер предвидена за 2 јуни 2022 во Куманово.

(Текстот е објавен во ТВ и Филмски печат на 13 мај 2022 во весникот „Слободен печат“)

Видео на денот