ФЕСТИВАЛ за женско творештво: Поетска визура на положбата на жената на Балканот
Првиот фестивал за женско творештво „И литературата има женско лице“, под мотото „Тие“ во организација на Ребека Чиловиќ, се одржа од 6 до 8 март во Беране, Црна Гора.
Претставник од Македонија беше поетесата Снежана Стојчевска, која покрај претставувањето на својата поезија на свеченото отворање на фестивалот, учествувала и на панел-дискусијата на тема: Родово читање на филмот „Убавината на порокот“ од режисерот Живко Николиќ. На дискусијата учествувале и активистката Ајша Хаџибеговиќ и професорката по книжевност Љерка Петковиќ.
– Овој култен црногорски филм на Николиќ со сета негова симболика беше искористен како визура преку која се дискутираше за положбата на жените во црногорското општество, па и пошироко на Балканот, објасни Стојчевска.
На панел-дискусијата Стојчевска зборувала не само од аспект на поетеса, туку и како координатор на продукција во „Квазар Филм“, но и како жена и мајка. Минатата година Стојчевска ја промовираше својата петта книга со наслов „Ќе се завијам во песни“. Стиховите во збирката се посветени на нејзиниот починат татко Мирче Стојчевски.
Претходно ги објави стихозбирките „Шеќер по подот“ (2012, Или-Или), „Под нулата“ (2013, награда „Бели мугри“), „Модри фантазии“ (2015, Темплум) и „Треба да е лесно“ (2017, Антолог).
(Текстот е објавен во „Културен печат“ број 23, во печатеното издание на „Слободен печат“ на 21-22 март 2020)