Фестивал за современи уметности „Акто“ 2020: Човек на човека мора да му е семејство
Со изработката на муралот „Еднакви, заедно посилни“ на фасадата на салата „Партизан“ во Кавадарци заврши серијата мурали со која беше отворена програмата на јубилејното 15-то издание на Фестивалот за современи уметности „Акто“.
Во изминативе месеци во продукција на организацијата „Факултет за работи што не се учат“ и во рамките на програмските активности на Фестивалот за современи уметности „Акто“ беше реализирана серија мурали во седум македонски градови, и тоа во Битола, Прилеп, Велес, Кочани, Гевгелија и Скопје.
Серијата заврши со изработката на муралот „Еднакви, заедно посилни“ на фасадата на салата „Партизан“ во Кавадарци. Авторка на муралот е ликовната уметница и професорка Јана Јакимовска, а во изведбата учествуваа и уметниците Симона Манчева и Ненад Тонкин. Изработката на муралот е во продукција на „Факултет за работи што не се учат“ во партнерство со Општина Кавадарци и КСП „Подиум – Јадро“ од Кавадарци.
– Муралот „Еднакви, заедно посилни“, преку варијација на приказната за џиновската репка, зборува за солидарноста, но и за еднаквоста. Џиновската репка не може од земја да ја извлече еден човек, туку здружените сили на сите помагачи. А онаму каде имаме солидарен труд, нужно е да зборуваме за сите чинители и нивната еднаква заслуга. Ако семејството почива на принципите на солидарност, тогаш тоа мора да се преслика и пошироко во општеството, и особено мора да се подаде рака кон сите индивидуи и групи што се на маргините. Човек на човека мора да му е семејство, без оглед на меѓусебните разлики. Оттаму, силуетите се изведени со црна боја, како би се занемариле сите индивидуални специфики. Сета различност е пресликана во шаренилото на небесниот свод. Наративниот дел на муралот се протега во должина на 24 метри во вкупна површина од околу 80 метри квадратни – посочија од „Акто“.
Покрај муралите, програмата на 15-то издание на „Акто“ вклучува и „Акто – онлајн ретроспектива“, „Акто агора“, „Акто публикација/архива“, „Акто за солидарноста“, како и други содржини што дополнително ќе бидат објавени.
(Текстот е објавен во „Културен печат“ број 49, во печатеното издание на „Слободен печат“ на 19-20 септември 2020)