Фестивалот на нова музика „Здраво млади“ своето јубилејно 10-то издание го одржа во навистина посебен амбиент во Парк МКЦ. Кризната ситуација со коронавирусот создаде идеална можност за поинаков и порелаксиран пристап во организацијата на фестивалот со редуциран број билети.

„Секое лошо за добро“, велат мудрите, а присутните на фестивалот уживаа во квалитетен и енергичен звук со целовечерна музичка програма понудена од домашните „Фанк шуи“ и „ПМГ Колектив“, како и гостите „Ефтеркланг“ од Данска, „Лалалар“ од Турција и диџеј Фиц од Ирска.

Организаторите од МКЦ како наследство од годинашното издание си добија и една пресимпатична макета, наменски изработена од „МврСвр продукција“. Макетата беше изработена за промотивниот спот, а сега ќе треба да си го најде своето фиксно место во МКЦ.

Фотографии: Стефан Рајхл

(Текстот е објавен во „Културен печат“ број 47, во печатеното издание на „Слободен печат“ на 5-6 септември 2020)