Фестивал на медитерански филмови и автори ќе се одржи во Стар Дојран

Првото издание на Меѓународниот филмски фестивал „Преку езерото / Across the lake – Дојран филм фестивал“ ќе се одржи од 5 до 7 август во Стар Дојран.

Станува збор за фестивал на медитеранскиот и европскиот филм, како и автори кои живеат или потекнуваат од медитеранските и европските земији и е прв филмски фестивал од ваков формат во Македонија.

Фестивалот ќе го збогати културниот живот во градот и околината и традиционално ќе се одржува во Дојран, покрај брегот на езерото. „Преку езерото“ е иницијатива предводена од Јани Бојаџи, филмски режисер и продуцент.

За првото издание на фестивалот селектирани се девет кратки филмови од осум медитерански земји, со актуелни теми кои се раскажани со медитерански дух, специфичен и посебен во уметноста на филмот.

Главната натпреварувачка програма на фестивалот ги содржи филмовите „А ла карт“ на Василис Циуварас и Таксиархис Делијанис (Грција / 2022), „Пресуда“ на Дора Јунг (Србија / 2022), „Марко“ на Марко Шантиќ (Хрватска / 2021), „Перики“ на Ангела Димеска (Македонија / 2022), „Виножито“ на Александар Вујовиќ (Црна Гора / 2020), „Криминалци“ на Серхат Караслан (Турција / 2021), „Што не знаеме за Маријам“ на Морад Мостафа (Египет / 2021), „Светиот син“ на Аљоша Масине (Италија / 2022) и „Поглед од балкон“ на Арис Капланидис (Грција / 2021).

Покрај главната програма во склоп на фестивалот ќе се прикажат и неколку долгометражни филмови од медитеранските земји, кои се истакнале по особениот пристап на темата што нуди нов поглед на нештата и го поттикнува дијалогот помеѓу различните култури, општествени групи, нации.

Во рамките на фестивалот ќе се одржи и мастерклас на тема „Трагањето на сценаристите по вистинското значење на темата во нивните сценарија“. Мастеркласот ќе го води докажаниот скрипт-консултант од Англија Џон Стивенс.

Меѓународното жири кое ќе ги оценува филмовите во натпреварувачката конкуренција ќе го предводи истакнатиот грчки режисер Василис Мазоменос, а членови на жирито се Гоце Кралевски, продуцент, и Ева Камчевска, сценарист од Македонија, извести Организацискиот одбор на новиот филмски фестивал „Преку езерото“.

Видео на денот