Фејсбук објави војна на дезинформациите за вакцините за ковид-19
Фејсбук соопшти дека ќе ги блокира и избрише од својата социјална мрежа сите лажни тврдења за вакцините против ковид-19, кои ги открија здравствени експерти, откако во октомври беше објавено слично соопштение во врска со мрежата Јутјуб од компанијата „Алфабет“.
Новиот потег ги проширува сегашните правила против лажните вести и теориите на заговор за пандемија.
Компанијата посочува дека ќе ги отстрани дезинформациите за коронавирусот што претставуваат ризик од непосредна штета, истовремено ќе се обележуваат и ќе се намали дистрибуцијата на други лажни тврдења што не успеваат да го достигнат тој праг.
Фејсбук соопшти дека промената на политиката е одговор на веста дека вакцините „ковид-19“ ќе се користат низ целиот свет. Фармацевтските компании „Фајзер“ и „Модерна“ од САД побараа вонредно одобрување за употреба на вакцини.
Дезинформациите за вирусот корона се ширеа преку социјалните мрежи за време на пандемијата, вклучувајќи објавувања против вакцини на различни платформи и од сметки на разни идеолошки групи.
Фејсбук објави дека ќе ги отстрани најавите за заговори поврзани со вакцината ковид-19, како што се тврдењата дека безбедноста на вакцината е тестирана кај луѓе без нивна согласност и други дезинформации за вакцините.
– Ова може да вклучува лажни тврдења за безбедноста, ефикасноста, состојките или несаканите ефекти поврзани со вакцината. На пример, ќе ги отстраниме лажните тврдења дека вакцините против ковид-19 содржат микрочип – посочуваат од Фејсбук.
Компанијата не прецизираше кога ќе започне да ја спроведува новата политика, но призна дека не може да воведе нова политика преку ноќ.