Федерер нема да игра ниту на Олимписките игри во Токио?
Причините за ваквото размислување не се поврзани со случувањата на тениските терени.
Швајцарските медиуми тврдат дека тенискиот турнир на Олимписките игри во Токио, најверојатно ќе биде без една од најголемите ѕвезди, Рожер Федерер.
Федерер кој неодамна се врати на тенисот по 13-месечна пауза , но веднаш по настапот во Доха, Швајцарецот донесе одлука да не учествува на турнирот во Дубаи, а не е и меѓу пријавените за Мастерсот во Мајами, за да се посвети на тренинзите. Сега, медиумите во Швајцарија пишуваат дека Федерер најверојатно нема да игра на ОИ во Токио и тоа поради причини кои немаат врска со случувањата на теренот.
Според информациите со кои располага весникот „Блик“, Федерер нема да учествува на Игрите во Токио бидејќи не сака да биде одвоен од семејството неколку недели. Имено, организаторот на Игрите, размислува да забрани престој на семејствата на спортистите во Олимпиското село, што значи дека во Токио нема да можат да пристигнат сопругата на Федерр, Мирка и нивните четири деца.
Федерер не е подготвен на таква жртва на 39 години, и доколку стане официјална одлуката на организаторот за забрана на присуство на семејствата во олимпиското село, тогаш и Швајцарецот официјално ќе се откаже од настап во Токио.
