Во завршницата на Вимблдон се пласираа тенисерите кои доминараат во последните 15 години, Роже Федерер, Рафаел Надал и Новак Ѓоковиќ. Првиот тенисер на АТП ранг листата, Ѓоковиќ утре го очекува полуфинална пресметка со Роберто Баутиста Агут, додека второто полуфинале претставува тениски класик, Федерер и Надал ќе играат еден против други по јубилеен 40. пат. Досега Надал е поуспешен со 24 победи, наспроти 15. на Федерер, но јубилејниот дуел се игра на омилената подлога на Федерер, на трева.

Сепак, поголемо внимание кај јавноста од нивниот дуел предизвикува, доминацијата на големата тројка во тенисот. Иако сите тројца имаат над 30 години, а Федерер е најстар со 38 години, тие сè уште  се главните фаворити за гран слем титулите и редовно играат во завршницата.

– Да, ова не е нормално. Кој би помислил дека нашата доминација ќе трае толку долго. Сепак, факт е дека помладите генерации на тенисери кои доаѓаат не се толку талентирани како Рафа, Новак и јас – вели Федерер.

За доминацијата на големата тројка во последните 15-тина години говори и податокот што тие триумфираа на 53 од последните 64 гран слем турнири.
Иако има 38 години, Федерер со игрите на Вимблдон покажа дека може уште неколку години да се бори за трофеите.

– Не постои причина зашто Федерер не би играл уште 3-4 години. Тој изгледа фантастично за своите години, со движењата и играта, дури изгледа како да има десет години помалку – вели легендата на светскиот тенис, Џон Мекинро.