Доколку се помине добро, првите дози на безбедни и ефикасни вакцини ќе бидат достапни за високоризичните групи во САД кон крајот на декември или евентуално на почеток на јануари, соопшти денеска Ентони Фаучи, водечкиот американски имунолог.

На основа на проекциите на главните компании Модерна и Фајзер, Американците во „некој момент од декември ќе знаат дали постои ефективна вакцина или не“, додаде Фаучи.

„Првиот увид во вакцината би требало, се надевам, да го имаме во наредните неколку недели“, рече тој, а пренесува Ројтерс.

Модерна и Фајзер ја почнаа финалната фаза од клиничкото тестирање кон крајот на јули, кога учествуваа десетици илјади луѓе.

Од Модерна денеска соопштија дека се на добар пат да ги дадат прелиминарните податоци од последната фаза на тестирањето на вакцината веќе следниот месец.

Компанијата Фајзер која треба да ги обелодени прелиминарните податоци од тестирањето во октомври, нема да стигне да ги објави пред ноември, а тоа најверојатно ќе се случи кога ќе завршат претседателските избори на 3 ноември.