Вистинска реткост на музичката сцена е во една вечер да бидат изведени 18 композиции на автори од Македонија. Подвигот е уште поголем кога дел од композициите имаат светска или македонска премиера.

Таков подвиг, во суштина, е достоен на виртуозот на пијаното Симон Трпчески, кој на 24 ноември во големата сала на Филхармонијата настапи со девет свои музички пријатели, а заедно изведоа дела од 12 композитори во рамките на фестивалот „Денови на македонска музика“.

„Слушнавме исклучително квалитетни уметници, кои ни приредија вечер што ретко се случува на концертите во други околности. Тие ни приложија внимателно избрани дела, кои ги изведоа со високо стилско и естетско ниво. Технички совршено со исклучителен однос кон формалната и содржинската структура на композициите, како и кон стилската карактеристика кон секое дело поединечно. Одлично обоени фрази, јасно потенцирана ритмичка пулсација, внимателен приод кон тонското и хармонското боење на сите авторски дела и нивните карактерни елементи“, констатира композиторот Стојан Стојков.

(Текстот е објавен во „Културен печат“ број 58, во печатеното издание на „Слободен печат“ на 28-29 ноември 2020)