Ф1: Жоу за малку ќе загинеше во Силверстон, но порача: Се гледаме во Австрија
Возачот на Алфа Ромео излезе неповреден од страшната несреќа во Британија што можеше да го чини живот. Тој најави дека сака да вози на ГН во Австрија викендов
Возачот на Алфа Ромео Жоу Гуангјоу имаше спектакуларна несреќа во првиот круг на Ф1 трката во Силверстон за Големата награда на Велика Британија.
Неговиот автомобил излета од патеката, се преврте, се лизгаше наопаку со голема брзина некое време, а потоа беше исфрлен преку оградата.
По ужасната глетка, сите мислеа дека Жоу ќе мине тешко, но тој беше потполно неповреден. По трката изјави дека таканаречениот „ореол“ над кокпитот му го спасил животот.
Следната трка е во Австрија и бидејќи лекарите не му најдоа повреди тој испрати порака преку социјалните мрежи дека сака да се трка на патеката „Ред бул“.
– Сакам да им се заблагодарам на официјалните лица и на медицинската екипа на Силверстон. Беа фантастични. Се гледаме во Австрија – порача Кинезот.
Трката на патеката „Ред бул“ во Австрија е закажана за следниот викенд.