Ф1 станува досадна, Мерцедес повторно доминантен
Формула 1 шампионатот е на добар пат да стане неинтересен уште во првата третина од сезоната. И во петтата трка оваа сезона која се возеше за Големата награда на Шпанија, возачите на Мерцедес по петти пат остварија еден-два победа.
Овој пат триумфот му припадна на актуелниот шампион Луис Хамилтон, ова беше негова трета победа сезонава, а вкупно 76 во кариерата.
Хамилтон стартуваше како втор, но по првата кривина го помина клупскиот колега и сите 66 круга на патеката „Каталуња“ ги извозе како првопласиран. Згора на тоа, заработи дополнителен поен бидејќи го имаше и најбзиот круг.
На двоецот од Мерцедес, на победничкиот подиум му се придружи и возачот на Ред Бул, Макс Верстапен кој во директен дуел беше подобар од двајцата возачи на Ферари, Себастијан Фетел и Шарл Леклерк.
Хамилтон со 112 бодови е лидер во генералниот пласман, на второто место и Валтери Ботас со 105 бодови, додека Макс Верстапен е на третото место со 66 бодови.
Следната трка во Формула 1 шампионатот е за две недела, на 26 мај се вози трката за Големата награда на Монако.