Возачот на Ред Вул, Макс Ферстапен ја оствари првата победа во кариерата на патеките во Италија откако слевеше на трката за Големата награда на Емилија Ромања. Ферстапен во Имола дојде до 11. победа во кариерата и притоа ја прекина серијата на лоши резултати во Италија.
Минатата сезона во Имола, Ферстапен не ја заврши трката, но денеска најдобро се снајде во хаотичната трка која еднаш беше прекината, а потоа и „успорена“ со излегувањето на безбедносното возило на патеката.
Второто место му припадна на актуелниот шампион Луис Хамилтгон и тоа откако ја направи една од најголемите грешки во последните неколку години. Возачот на Мерцедес на крајот задоцни дури 22 секунди зад победникот, а третото место на победничкиот подиум му припадна на Ландо Норис од Мекларен.

Клучниот потег за триумфот, Ферстапен го направи на самиот старт кога ги претекна прво тимскиот колега Серхио Перез, а потоа и Хамилтон притоа имајќи контакт со болидот на Британецот. До крајот на трката Хамилтон единствената шанса да го помине Ферстапен ја имаше при заминувањето во пит стопот, но лошата работа на механичарите му одзеде драгоцено време како и шансата да го престигне конкурентот.

Четвртото место му припадна на возачот на Ферари, Шарл Леклер, веднаш зад него беше клупскиот колега Карлос Саинс, а бодови освоија уште и Даниел Рикиардо од Мекларен, Ленс Строл од Астон Мартин, Пјер Гасли од Алфа Таури, Кими Раиконен (Алфа Ромео) и возачот на Алпине Естебан Окон.
Хамилтон го задржа водството во генералниот пласман со 44 бода, еден повеќе од Ферстапен, а следната трка ќе се вози на 2 мај и тоа за Големата награда на Португалија.