Евтино освежување на ѕидовите во домот: Тапетите повторно во мода
Најбрз, наједноставен, а притоа и најевтин начин за да ги освежите ѕидовите во домот и притоа да добиете нова димензија на просторот е обложувањето со тапети. Токму ваквата подзаборавена декорација на просторот која во 80-тите години на минатиот век беше присутна речиси во секој дом, но која подоцна беше подзаборавена, повторно стана популарна. Изобилството на бои, шаренила, светли или потемни, па дури и оние еднобојните, даваат посебна топлина во домот и чувство на уживање. Токму нив можете да ги вклопите во секој дел од домот, независно дали станува збор за детска соба, спална, кујна или пак соба за дневен престој.
Денеска, изборот на тапети во споредба со минатото е многу поголем, како во однос на колоритот така и по квалитетот. Најновите трендови пак освен обичните „мазни“ тапети, нудат и т.н. 3Д тапети, кои на просторот му даваат поголема димензионалност, длабочина и карактер.
На пазарот тапетите како вид на декорација на ѕидовите се присутни во повеќе различни стилови како што се класични, модерни, ретро или пак тапети приспособени за во детските соби каде што најчесто се отсликуваат јунаците од цртаните филмови. Тренди декорациите за на ѕид ги има во најразлични бои и текстури. На модерните тапети како мотиви најзастапени се минималистичкитe, цветните, геометриските и апстрактни мотиви, како и мотиви од времето на барокот, а особено атрактивни се мотивите во боите на годишните времиња.
За дневната соба идеално решение се тапети со мултиплицирани мотиви кои само ќе го украсат ѕидот, а нема многу да привлекуваат внимание бидејќи тоа сепак е простор во кој се поминува најмногу време. За опуштање во спалната соба и за помирен сон може да се постават фототапети со смирувачки призори во сина или зелена боја.
Во детската соба со помош на фантазијата, внесете живи и весели мотиви кои ќе ја поттикнуваат детската разиграност. Инаку не е препорачливо со тапети да се обложуваат споредните ѕидови. Идеално е да се постават на ѕидот до гарнитурата за седење, до креветот или позади него во спалната соба.
Сепак, разликата во однос на некогашната употреба на тапетите и во тоа на кој начин истите се користат денес, е во начинот на нивното „лепење“ на ѕидовите.
Ако истите во минатото се користеле за обложување на цели ѕидови, денес се ставаат само на еден ѕид или пак само на еден мал дел од ѕидот, но на истите се практикува да има поголеми мотиви и на тој начин истите полесно доаѓаат до израз.
Најновите генерации на тапети, за разлика од некогашните, лесно се ставаат и вадат, отпорни се на влијанието на сончево зрачење, боите се поквалитетни и попостојани, а исто така и одржувањето е олеснето поради можноста да се мијат.
Доколку се одлучите на овој начин да внесете свежина во вашиот дом, изберете декоративни тапети според бојата која доминира во просторијата во која што планирате да ги залепите. Доколку на просторијата и треба детаљ кој ќе го одвлече вниманието, тогаш одберете впечатливи облоги за ѕидот. Сепак, најдобар избор за тоа е да излепите со тапети само еден ѕид во дневната или пак во детската соба. Сепак одберете различни мотиви.
Еднобојните и двобојните тапети пак се интересен детаљ во просторија во која нема премногу бои и шаренило, како на пример работна соба, ходник или целосно обложена дневна соба. За што и да се одлучите, обрнете особено внимание на тоа, колку долго сакате истите да ви останат залепени на ѕидот. Затоа, одберете некоја покласична варијанта ако планирате да уживате со истите следните неколку години, но доколку сте човек кој сака секоја година да менува нешто во домот, тогаш одберете од оние модерните и тренди тапети со живи бои, кои се хит оваа сезона.
Доколку пак сте од оние кои не штедат средства при уредувањето на својот сопствен дом, тогаш, украсете ги ѕидовите со најновите 3Д декоративни тапети кои ќе внесат посебна енергија и вистинско освежување во секое ваше катче.
Ваквите 3Д тапети се дефинитивно последниот хит кај домашното уредување бидејќи покрај тоа што изгледаат тотално модерно, тие ќе им дадат живот на вашите ѕидови.
При уредувањето на просторот со помош на тапети, обрнете особено внимание на боите кои доминираат во просторот. Белата боја како подлога на ѕидовите е идеална за основа, доколку сте се одлучиле да залепите тапети со крупни мотиви или пак во најразлични бои. Никако не се препорачува обложување на сите ѕидови во една просторија со тапети, особено ако е просторијата со помала квадратура. Само еден ѕид облепете го со тапети со крупен мотив, а останатите ѕидови обојте ги во една нијанса која е присутна на тапетите. Розевите тонови му даваат на просторот романтичност, а сивите го прават попрефинет. За послабо осветлените простори идеални се тапетите во бела боја.