Европскиот Парламент денеска усвои резолуција за Белорусија, во која се наведува дека таканаречениот опозициски Координативен совет е „привремен претставник на народот” во таа земја.

Резолуциите на ЕП не се обврзувачки, но имаат сила на препорака. Тие сметаат дека Лукашенко нема мандат да потпишува никакви договори, вклучително и со Русија. 

Како што се наведува во документот, ЕП „го поздравува Координативниот совет како привремен претставник на народот кој бара демократски промени во Белорусија”.

-Нагласуваме дека Европскиот парламент, во согласност со ставот на Европскиот совет, ги отфрла резултатите од таканаречените претседателски избори во Белорусија што се одржаа на 9 август, со оглед на тоа што тие се одржаа во недопуштена повреда на сите меѓународно признати норми и не го признава Александар Лукашенко за претседател на Белорусија– стои во документот.

Во тој поглед, како што се додава, се повторува повикот на „белорускиот народ за организирање нови, слободни и фер избори што е можно поскоро, под меѓународен надзор”, предводени од Канцеларијата на ОБСЕ за демократски институции и човекови права во согласност со меѓународно признати стандарди.

Резолуцијата предвидува воведување санкции против Лукашенко и голем број белоруски граѓани, пишува порталот Нова.рс.

Со Резолуцијата се повикуваат Европската комисија, високиот претставник на ЕУ за надворешна политика и безбедност и Европскиот совет да обезбедат помош на „белоруската демократска опозиција, вклучувајќи го и Координативниот совет предводен од Светлана Тихановскаја”.

Масовните протести на опозицијата во Белорусија започнаа на 9 август, по претседателските избори, на кои Александар Лукашенко прогласи победа со 80,1 процент од гласовите.

Опозицијата не ги призна резултатите од изборите и смета дека победи Тихановскаја, која официјално освои 10,12 проценти од гласовите.