Европската комисија се мобилизира во борбата против коронавирусот

Урсула Фон дер Лајен/ Фото: EPA-EFE/STEPHANIE LECOCQ

Пред видео самитот на шефовите на држави и влади на ЕУ што се одржува попладнево во Брисел и на кој еднинствена точка е борбата против Ковид-19, претседателката на ЕК Урсула фон дер Лајен имаше свое видео обраќање на кое ги најави темите на кои ќе се разговара, јави дописничката на МИА во Брисел.

Фон дер Лајен рече дека разговарала со италијанскиот премиер Џусепе Конте и му ја изразила нејзината поддршка за италијанскиот народ. Наскоро ќе се одржи видео средба со италијанските власти за да се најде најефикасниот начин да и се помогне на Италија и какви мерки се потребни.

Шефицата на ЕК констатираше дека многу сектори страдаат во овој момент и за нив треба помош.

Таа го цитираше како пример секторот на авиотранспортот на кој Ковид-19 има огромно влијание.

-Секојдневно го констатираме влијанието врз овој сектор и знаеме дека тоа ќе продолжи. Затоа ЕК сака брзо да усвои легислатива за аеродромските слотови (утврдени термини за полетување). Сакаме да им помогнеме на авиокомпаниите да ги сочуваат нивните аеро термини дури и ако не ги користат поради падот на авио сообраќајот, рече таа.

И додаде дека треба да се избегнуваат таканаречените „фантомски летови”, летови во кои практично нема патници, но авио-компаниите ги користат за да не ги загубат аеродромските слотови.

Во ЕК забрзано се разгледуваат можни мерки за да се спречи ширењето на вирусот, како се забрза потрагата по соодветен третман и вакцини.

ЕК, исто така, одржала состанок со производителите на заштитни материјали. Во наредните денови е закажан разговор и со фармацевтската индустрија за снабдување со лекови и заштитни материјали.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот