Европската комисија ја претстави дигитална стратегија која ќе ја направи Европа важен играч во дигиталното подрачје, во моментов ЕУ е зад САД и Кина.

Комисијата ја изнесе визијата за европско општество засновано врз дигитални решенија направени по мерка на човекот, кои им даваат на бизнисите нови можности и го поттикнува развојот на сигурна технологија за промовирање на отворено и демократско општество и динамична и одржлива економија. Дигиталниот сектор е клучен фактор во борбата против климатските промени и реализацијата на зелената транзиција.

-Денес ги презентираме нашите цели за градење дигитална иднина на Европа. Опфатени се подрачја кои се движат од сајбер-безбедност, клучни инфраструктури, дигитално образование и вештини до демократија и медиуми. Би сакал да ја видам дигиталната Европа како го одржува најдоброто од Европа – отвореност, праведност, разновидност, демократија и доверба- рече претседателката на Европската комисија, Урсула фон дер Лејен.

Комисијата ја откри Белата книга, отворајќи јавна расправа за рамката за сигурноста на вештачка интелигенција која е темел на извонредност и доверба. Целта е во партнерство со приватниот и јавниот сектор, да се мобилизираат ресурсите по целиот ланец на вредности и да се создадат соодветни стимулации за побрзо распоредување на вештачката интелигенција, вклучително и во малите и средни претпријатија.

-Европа ги има сите предуслови да стане светски лидер во безбедни и употребливи системи на вештачка интелигенција. Имаме одлични истражувачки центри, безбедни дигитални системи и напредна роботика, како и конкурентни производствени и услужни сектори, од автомобилскиот и енергетскиот сектор до здравствената заштита и земјоделството- наведува Комисијата.

Претседателот на Комисијата Урсула фон дер Лејен посочува дека „вештачката интелигенција мора да им служи на луѓето и секогаш да биде во согласност со човековите права“.

-Ова е токму причината зошто мора да има контрола врз критичните одлуки. Таканаречената високо-ризична вештачка интелигенција мора да биде проверена и сертифицирана пред да може да се појави на пазарот- рече Фон дер Лејен.