Европратеници во Србија: Има позитивен напредок пред изборите, но и доцнење во спроведувањето на мерките

Тања Фајон / Фото: EPA/DUMITRU DORU

Европратеникот Владимир Билчик на крајот од посетата на Белград денеска изјави дека во Србија има позитивен напредок пред изборите на 3 април и додаде дека од клучно значење е спроведувањето на договорените мерки бидејќи има одредено доцнење, јави дописникот на МИА од Белград.

– Жал ни е што гледаме доцнења во спроведувањето на некои мерки, изјави Билчик на прес-конференција на крај од посетата на ЕУ пратениците на Белград, наведувајќи дека клучна е работата на Привременото тело за надзор на медиумите.

Според него, медиумската сцена и понатаму е поларизирана, но постои подобрувања во јавните сервиси на РТС и РТВ.

Тој оцени дека 16-те договорени мерки ќе можат да и дадат шанса на Србија за фер избори, додавајќи дека тоа е можност која сите треба да ја искористат.

Европратеничката Тања Фајон изјави дека меѓународната заедница ќе ги следи изборите, додавајќи дека тоа е уште еден тест за Србија за „подобар живот на граѓаните, демократија и слобода на медиумите”.

– Овој пат нема бојкот, а топката е на страна на политичките актери во Србија, истакна Фајон.

На прес-конференцијата присуствуваа и ЕУ посредниците Едуард Кукан и Кнут Флекенштајн, кој нагласи дека тие не дошле „како адвокати на опозицијата” туку да помогнат во дијалогот.

– Што се однесува до медиумската сцена, за мене е важно да сте отворени за сите соговорници и политичарите да не бираат со кого да разговараат, бидејќи на тој начин граѓаните ќе добијат поинаква слика и ќе можат да избираат, порача Флекенштајн.

Видео на денот