Кошаркарите на Црвена звезда во третото коло од Евролигата го доживеаја вториот пораз, а прв на домашен терен.
Подобар од „црвено-белите“ беше литванскиот Жалгирис кој славеше со 69:75. За разлика од Црвена звезда, за Жалгирис ова беше трета победа во третиот натпревар досега и засега е најпријатно изненадување.

Гостинскиот тим беше подобар противник во текот на целиот натпревар, успеа да го запре најсилното оружје на Црвена звезда – шутот за три поени, но сепак натпреварот беше решен во последните моменти од средбата. Српскиот тим во финишот успеа да намали на 67:69, но Жалгирид возврати преку Лекавичиус и Григонис кои беа сигурни од линијата за слободни фрлања и ја заверија победата на својот тим.

Токму Лекавичиус беше најпрецизен во литванскиот тим со 16 поени, додека Жофри Ловерњ даде 12, а кај Црвена звезда најдобар беше Џордан Лојд со 19 постигнати поени.

Турскиот Анадолу Ефес немаше никакви проблеми на гостувањето во Берлин кај Алба која ја совлада со 93:72. Гостите победата ја обезбедија уште по првата четвртина која ја добија со 15 поени разлика (29:14) и до крајот на натпреварот рутински ја одржуваа предноста. Тибор Плајс со 23 поени и Василије Мисиќ со 13 поени беа најрасположени за игра кај турскиот тим, додека во редовите на Алба се истакна Маркус Ериксон со 13 поени.

Во шпанската пресметка, Барселона и без својот најдобар играч, Никола Миротиќ, како гостин ја совлада Валенсија со 66:71. Двете екипи беа израмнети со скоро сите статистички податоци, а само во еден отскокнуваа кошаркарите на Барселона, имаа 65.7% успешност за два поени, додека Валенсија имаше 52.9% како и одличната игра во третата четвртина која каталонците ја добија со 9:21. Најефикасен во редовите на Барселона беше Смитс со 15 поени, а Калатес даде 14 поени.

Останатите два натпревари од денешната програма во Евролигата помеѓу Асвел-Панатинаикос и Басконија-Зенит, се одложени поради големиот број на играчи на францускиот и рускиот кои се позитивни на коронавирус.