Евроамбасадорот Гир: Европската регулатива го забранува споделувањето на податоците како етничка и религиозна припадност
Евроамбасадорот во земјава, Дејвид Гир, уште еднаш појасни дека европската регулатива го забранува споделувањето на податоците како етничка и религиозна припадност.
Премиерот Заев пак вели дека императив на Македонија е усогласување на домашното законодавство со европската регулатива.
„Ова прашање е во делот на регулативата за генералната заштита на личните податоци. Со ова, при процесуирање на тие информации за етничката припадност, религиозната припадност и други елементи се забранети. Во моментов во Европската Унија личните карти се прашање кое се регулира поединечно од секоја земја-членка и тоа ќе биде така, меѓутоа, во август, оваа генерална регулатива за заштита на лични податоци се очекува да се усвои на ниво на Европската Унија и да важи за целата Унија“, изјави Дејвид Гир.
„Како земја-кандидат за членство во Европската Унија за нас секогаш императив е усогласување на домашното законодавство со европската регулатива. Во август или октомври, кога и да почне Европската Унија да дебатира по ова прашање и ние ќе се вклучиме, а секако на крајот ние ги следиме сите европски регулативи и одлуки заради тоа што сакаме да бидеме членка на Европската Унија“, рече премиерот Зоран Заев.