Еурофарм Работник со ужасен финиш, Татран ја освои Битола!
Денеска во рамките од петтото коло во ракометната Лига на шампионите повторно во еден нов крајно драматичен натпревар во салата „Боро Чурлевски“ минимален пораз на Еурофарм Работник со резултат 23:24 (14:13) од Татран Прешов.
Константно водеа домаќините во текот на првото полувреме, иако позитивата не беше поголема од два голови разлика. Потоа, во вториот дел поточно во 46 минута после голот на пивотот Граџан Еурофарм Работник имаше и четири голови разлика (21:17), но тоа не беше доволно да се одведе мечот до сигурни бодови.
Во последните 14 минути нападот на нашиот претставник потфрли кога беше најпотребно, неискористени чисти позиции, а тоа го казнуваше противникот кој трпеливо ја топеше својата негатива и направи серија од 5:0 за целосен пресврт.
Во самиот финиш од средбата битолската екипа успеа двапати да израмни, а во последната минута и со шанса да се врати во водство, но не го искористи својот напад. Тоа го направија гостите преку Лапајне за на крајот голема радост кај играчите на Голужа.
Први стрелци кај битолчани беа Остроушко со осум голови и Граџан со пет, а на спротивната страна кај Словаците се истакна Рабек со седум погодоци. На останатите две средби од рундата финскиот Кокс дома славеше над Спортинг со 25:23, а Бидасоа Ирун убедливо со 39:23 го надигра Савехоф.
На табелата води Бидасоа Ирун со девет бодови, пред Савехоф (осум), пет има Спортинг, четири Кокс, по два Еурофарм Работник и Татран Прешов. Во наредното шесто коло играчите на тренерот Стевче Алушовски ќе го играат во Словачка на 2 ноември (18.00 часот) против Татран Прешов.