Еурофарм Пелистер го најави спектаклот: По 18 години се враќа шампионската титула во Битола
Натпреварот од домашната Суперлига Еурофарм Пелистер – Тиквеш ќе се одигра в сабота, на 27 мај, од 18.00 часот во спортската сала „Боро Чурлевски“ во Битола.
Билетите за натпреварот ќе се продаваат почнувајќи од петок, 26 мај, од 15.00 часот на повеќе пунктови пред спортската сала „Боро Чурлевски“.
– Во билетот, по цена од 250 денари, ќе биде вклучена и зелена шампионска маичка, која ќе ја добиете при купувањето на секој билет. Ве молиме да ја понесете со себе и да ја „обоиме“ спортската сала во зелено за време на натпреварот. Носителите на сезонски билети на посебен пункт пред салата од петок 15:00 часот бесплатно ќе може да ја подигнат шампионската маичка. Ве молиме в сабота попладне најдоцна до 17:30 часот да ги заземете своето место во спортската сала „Боро Чурлевски“ – информираат од РК Еурофарм Пелистер.
По завршувањето на натпреварот, од 20.00 часот на плоштадот Магнолија во Битола ќе започне централната прослава за сите битолчани, во кој е е предвидена богата забавна, музичка и спортска програма. Деталите околу ракометниот хепенинг ќе бидат објавени на денот на натпреварот.
После 18 години шампионската титула во ракомет се враќа во Битола, тоа претставува голем повод за славење. По тој повод РК Еурофарм Пелистер ги повикува своите пријатели, симпатизери, навивачи, Чкембари и сите искрени подржувачи, в сабота заеднички да се прослави шампионската титула за сезоната 2022/23.
