Нападот со дронови на нафтените постројки на државната нафтена компанија „Арамко” во Саудиска Арабија претставуваат вистинска закана за регионалната безбедност, соопшти Европската унија.

– Во време кога тензиите се високи, овој напад ги поткопува тековните напори за деескалација и дијалог, стои во соопштението во кое се изразува жалење кон саудиските власти и народ.

ЕУ укажува дека е многу важно да се утврдат фактите и одговорноста за тој „срамотен чин”.

– Во исто време Европската унија го повторува својот повик за максимална воздржаност и дескалација, се додава во соопштението потпишано од портпаролката Маја Коцијанчиќ.

Нападот на двете нафтени постројки во Саудиска Арабија влијаеше на глобалното снабдување со нафта и го преполови производството на нафта на Саудиска Арабија. Одговорност за нападот преземаа јеменските шиитски бунтовници Хути.