ЕУ: Нема компромис околу заштитата на новинарите
Шефот на дипломатијата на Европската Унија (ЕУ), Жозеп Борел и потпретседателката на Европската комисија Вера Јурова се заложија за одбрана на слободата на изразување и информирање и казнување на одговорните за злосторства, за насилство и за заплашување на новинари.
Тие ги повикаа државите да ги изведат пред лицето на правдата одговорните за злосторства против новинари и рекоа дека ЕУ секогаш ќе ја брани слободата на изразување и ќе ги штити новинарите.
– Ова не е нешто за што можеме или сакаме да правиме компромис, потенцираа Борел и Јурова по повод 2 ноември, Меѓународниот ден за крај на неказнивоста за злосторствата извршени против новинари.
Во име на ЕУ, Борел и Јурова потенцираа дека новинарите играат основна улога во функционирањето на демократиите, придржувањето кон одговорност на оние кои се на власт и во обезбедувањето на навремени и фактички информации.
– Новинарите ширум светот се соочуваат со заплашување, со насилство или со злоупотреба, честопати ставајќи го својот живот во опасност. Вознемирувачки е што неказнивоста за злоупотреби и злосторства врз новинари и медиумски работници е сè уште раширена низ целиот свет, достигнувајќи 90 проценти од случаите во некои земји, се вели во извештајот на УНЕСКО за 2019 година, се вели во соопштението.
Борел и Јурова потенцираат дека ЕУ е посветена на подобрување на работната средина за новинарите, нивната заштита и безбедност преку проекти како што е платформата за мапирање на слободата на медиумите што помага да се следат заканите по слободата на медиумите во ЕУ и земјите кандидати за членство и Акцискиот план за европска демократија.
– Во нашите односи со други земји, секогаш сме биле јасни за клучната улога на неограничените медиуми и граѓанското општество и потребата да се заштитат бранителите на човековите права, од кои многумина се новинари. Делегациите на ЕУ ширум светот присуствуваат и внимателно ги следат судските случаи во кои се вклучени новинари, помагајќи да се идентификуваат оние случаи на кои им треба посебно внимание, се заклучува во соопштението.
