Европската унија (ЕУ) обезбеди помош за медиумите во Србија во износ од 2,4 милиони евра за справување со последиците од пандемијата на Ковид-19 во наредните три години, јави агенцијата „Бета“.

Апликантите може да добијат поддршка од 10.000 евра до 150.000 евра, а просечната вредност на грантовите е помеѓу 40.000 и 60.000 евра.

Шефот на Делегацијата на ЕУ во Србија, Сем Фабрици, изјави дека целта на проектот е што е можно поголемо ублажување на последиците од пандемијата на Ковид-19,  зајакнување на медиумското опкружување и истото да се направи понезависно и попрофесионално.

– Медиумите се погодени од двојни тешкотии – економски промени во начинот на водење на бизнис и технолошка трансформација, а во исто време тие мора да ја исполнат главната цел – независно и професионално информирање, рече Фабрици.

Фокусот на ЕУ, кога станува збор за медиумите, е обезбедување амбиент за слобода на изразување, порача Фабрици, оценувајќи дека спроведувањето на принципите на медиумската стратегија, донесена на почетокот на 2020 година, ќе помогне во создавање на поповолен амбиент, што е „клучен елемент за пристапувањето во ЕУ”.