ЕУ го усвои петтиот пакет санкции против Белорусија
Постојаните претставници на 27-те земји членки на Европската унија (ЕУ) го усвоија петтиот пакет санкции против белоруските власти, соопштено е денеска во Брисел.
„Претставниците на ЕУ утринава дадоа зелено светло за петтиот пакет санкции, во кој се опфатени околу 25 физички и правни лица”, изјави претставник на делегацијата на една од членките на ЕУ во Европскиот совет за руската агенција ТАСС.
Како што се наведува, се очекува одлуката да биде објавена во Службен весник на ЕУ и да стапи на сила утре.
Петтиот пакет вклучува санкции наметнати на Минск поради претседателските избори во август 2020 година, кои, според ЕУ, не се одржани на соодветен начин.
Санкциите се индивидуални по природа, бидејќи се насочени кон највисокото раководство на земјата, вклучувајќи го и претседателот Александар Лукашенко и членовите на неговото семејство, како и членовите на владата, безбедносните службеници, обвинителите и членовите на судството.
ЕУ веќе воведе четири пакети поединечни санкции, кои се однесуваат на 166 физички и 15 правни лица.
Извор: МИА