Ескобар: Санкциите против некои политичари во Република Српска се подготвени
Заменик-помошникот на американскиот државен секретар Габриел Ескобар денеска, на крајот од неговата посета на Босна и Херцеговина, изјави дека се подготвени санкциите, но оти тие нема да бидат насочени кон Република Српска, туку кон поединци, политички лидери кои дејствуваат против Дејтонскиот договор.
„Санкциите се на маса и не се само санкции. Постојат и други економски средства што можат да се спроведат, не само против лидерите кои водат антидејтонски активности, туку и против оние кои им даваат економска поддршка. Значи, компаниите што ги поддржуваат“, истакна Ескобар за Јавниот сервис на БиХ (БХРТ).
Тој додаде дека „не сака да се зборува дека ќе биде санкционирана Република Српска, бидејќи луѓето во овој регион доволно страдаа”.
Ескобар наведе и дека нема да има нова војна во БиХ.
„Земјата има цврсти безбедносни гаранции од САД и од нашите европски партнери“, посочи Ескобар.