Турскиот претседател Реџеп Таип Ердоган пред официјалната посета на Србија даде интервју за српскиот весник „Политика“, во кое вели дека неговата земја е подготвена да се вложи за да се реши проблемот со соседно Косово.

Турскиот лидер посочи дека Турција го поддржува продолжувањето на дијалогот на Приштина и Белград за траен и сеопфатен договор, поради тоа што овој договор е од клучно значење за долгорочната стабилност и мир на Балканскиот Полуостров. Дополнително, Ердоган кажа дека односите на двете земји се засноваат на меѓусебно почитување и разбирање.

– Србија игра важна улога во одржувањето на регионалниот мир и развојот на регионот – смета Ердоган, кој вели дека неговата земја дава поддршка за напорите на Србија кон економскиот развој и влегувањето во ЕУ.

Реџеп Таип Ердоган дополнително кажа дека Турција го гледа нашиот северен сосед како соседна земја, иако не делат заеднички граници, како и дека Турицја политиката кон Балканот не ја спроведува врз основа на религијата и дека не прави разлика меѓу народите кои живеат тука.