Турскиот претседател Реџеп Таип Ердоган го промени министерот за сообраќај Мехмет Турхан по кратка постапка.

Смената доаѓа во време кога Турција се бори против ширењето на епидемијата на коронавирусот, поради што во изминатите недели во оваа земја починаа 92 лица.

За нов министер е именуван Адил Караисмаилоглу, а причините за смената не се образложени. За време на предавањето на должноста, новиот министер рече дека претстојат важни „визионерски“ проекти кои ќе допринесат за развој на земјата.

– Заедно и брзо ќе ги спроведеме тие проекти – рече тој, а пренесува „Ројтерс“.

Турхан и неговото министерство во претходните денови се најдоа на мета на критичарите поради тоа што во екот на епидемијата на коронавирусот е организиран првиот тендер за подготвување на изградба на голем канал во близна на Истанбул.

Новиот министер дополнително посочи дека министерството во периодот на епидемијата ќе работи во рамки на препораките на министерството за здравство.