Ердоган контра САД, Русија и Франција: Не се мешајте во судирот во Нагорно-Карабах, 30 години го занемарувавте проблемот
Претседателот на Турција, Реџеп Таип Ердоган се спротистави на мешањето на САД, на Русија и на Франција во судирот во Нагорно-Карабах, откако лидерите на тие земји ги повикаа официјални Ереван и Баку да ги продолжат преговорите.
– Со оглед на тоа дека САД, Русија и Франција го занемаруваа овој проблем речиси 30 години, не е прифатливо да учествуваат во напорите за постигнување на прекин на огнот, истакна Ердоган.
Тој додаде дека трајно примирје е можно само ако „ерменските окупатори” се повлечат од Нагорно-Карабах.
Претседателите на САД, на Русија и на Франција, Доналд Трамп, Владимир Путин и Емануел Макрон денеска упатија апел до Ерменија и до Азербејџан да ги продолжат разговорите за Нагорно-Карабах без условување.
– Ги повикуваме лидерите на Ерменија и на Азербејџан да ги продолжат преговорите без условување, во добар дух и под покровителство на копретседавачките групи на ОБСЕ од Минск, се наведува во заедничкото соопштение.