Ердоган: Единствено решение за Кипар е создавање на две држави
Турскиот претседател Реџеп Тајип Ердоган денеска изјави дека единствено решение за повеќедеценискиот спор околу Кипар е воспоставување на две држави на островот.
Тој додаде и дека федерацијата за која се залага Атина нема да биде тема на претстоечките разговори кои се во посредство на Обединетите нации.
Лидерите на Грција и Кипар во понеделникот рекоа дека ќе прифатат само мировен договор за Кипар на основа на резолуцијата на ОН и ја отфрлија формулата за две држави на која инсистираат Турција и кипарските Турци, пренесува Ројтерс.
Ердоган на поддржувачите од својата партија им рекол дека не може да се сретне со грчкиот премиер Киријакос Мицотакис и покрај продолжувањето на разговорите меѓу Грција и Турција за споровите во Медитеранот. Ердоган рекол дека Мицотакис го „предизвикал“ и му порачал дека треба да ги „знае своите граници“.