Денеска во Будимпешта репрезентацијата на Исланд убедливо со 34:24 славеше над Црна Гора и остана во игра за едно од местата кои водат во полуфиналето на Европското првенство.

Во текот на сите 60 минути водеа Исланѓаните, почетната предност од 3:0 беше само најава дека играчите на селекторот Гудмундсон одат на триумф.

Пред паузата за првпат стекнаа позитива од „плус 10“ (17:7), а уште неколкупати имаа двоцифрена разлика во второто полувреме (32:22, 33:23).

Омар Инги Магнусон беше најефикасен во победата со 11 голови, а истиот учинок на спротивната страна го имаше и Милош Вујовиќ.

На табелата во групата „1“ од главната фаза води Данска со осум бодови која веќе го обезбеди настапот во полуфиналето на ЕП, следува Франција со шест, колку што има и Исланд. На исландските репрезентативци во корист оди само триумф на Данците против Франција, дуел кој е закажан од 20.30 часот.