Емил Рајковиќ најдобар тренер во ВТБ Лигата
Емил Рајковиќ е прогласен за најдобар тренер во силната ВТБ Лига. Рајковиќ минатото лето го презема казахстанскиот тим Астана и направи вистински бум во квалитетната лига која ја сочинуват екипи од Русија, Белорусија, Естонија, Казахстан, Летонија и Полска, во регуларниот дел од сезоната заврши на шестото место и за прв пат откако е дел од ВТБ Лигата, обезбеди пласман во плејфот.
Екипата на Астана под водство на поранешниот тренер на Фени Индустри, Работнички и МЗТ Скопје оствари рекордни 15 победи, но во плејофот е елиминиран од Химки .
По прв пат во историјата на лигата, клубот има позитивна кош-разлика, а нашиот тренер им го зема „скалпот“ на најсилните тимови во лигата како што се Уникс, Локомотив Кубан и Зенит. Покрај одличниот настап во ВТБ лигата, Рајковиќ со Астана сезонава го освои трофејот во националниот куп, а исто така е и најголем фаворит за освојување на титулата во домашниот шампионат.