Елмас: Сакам да ја завршам мојата кариера во Турција
Еден од најдобрите македонски репрезентативци е во Анталија со Наполи кој се подготвува за новите натпревари оваа сезона, а тие ќе продолжат на почетокот од новата 2023 година.
Елиф Елмас во интервјуто за турскиот портал „ДХА“ зборува за амбициите на италијанскиот клуб.
Моментно во шампионатите, во италијанската Серија А Наполи е лидер со 41 бод по 15 кола, осум повеќе од второпласираниот Милан, а во турската Супер лига Фенербахче по 13 кола е првопласиран со 29 бодови, два повеќе од Галатасарај на втората позиција.
– Се надевам дека Фенербахче ќе биде шампион оваа сезона. Шампиони и Фенербахче и Наполи сезонава? Тоа би било одлично. Во Неапол играме добри натпревари и во Лигата на шампионите. Во Серија А победивме на 13 натпревари и двапати ремизиравме (без пораз). Во моментов ни оди одлично, но мораме да гледаме напред и да не застануваме. Сакаме да го продолжиме патот и во Лигата на шампионите. Имаме големи цели – вели Елмас.
Во ЛШ во осминафиналето „наполитанците“ на 21 февруари и 15 март 2023 година ќе ги одмерат силите против Ајнтрахт Франкфурт.
– Навивачите на Фенербахче се фантастични, како оние на Наполи. Ја сакам Турција и размислувам да дојдам да живеам овде. Сакам да ја завршам кариерата во оваа земја – се зборовите на нашиот фудбалски „дијамант“.
Од 18.45 часот денеска Наполи ќе игра контролен натпревар против Анталијаспор, а четири дена подоцна составот на Лучано Спалети ќе тестира и против англискиот Кристал палас.
Македонскиот репрезентативец Чурлинов им се врати на тренинзите во Барнли