Македонскиот репрезентативец Елиф Елмас би можел да си замине од Наполи во летниот преоден рок доколку не добие гаранции од управата и тренерот Лучано Спалети, пишуваат италијанските медиуми.

Имено, Елмас кој не беше задоволен од дадената шанса минатата сезона, побарал гаранции од тренерот Спалети дека ќе добие поголема минутажа во следната сезона и почесто да биде дел од првиот тим на Наполи или во спротивно да биде ставен на трансфер листата и да биде продаден на екипа во која редовно ќе игра.

Елиф Елмас минатата сезона одигра на 46 натпревари за Наполи, но во најголем дел од нив, македонскиот репрезентативец ги започнуваше од клупата за резервни играчи.

За да не му се повтори истото и во наредната сезона, Елмас побарал гаранции дека ќе добие поголема минутажа посебно бидејќи во преодниот рок можно е Наполи да остане и без Фабијан Руиз, Матео Политано и Диего Деме кои му се конкуренција во средниот ред на македонскиот репрезентативец.

Елиф Елмас во Наполи пристигна во 2019 година од Феенрбахче за 16 милиони евра плус бонуси и тоа на инсистирање на тогашниот тренер на екипата, Карло Анчелоти.

Досега нема пристигнато понуда за Елмас, но сигурно е доколку биде ставен на трансфер листата, ќе се појават заинтересирани екипи, како што се шпекулираше во јануари годинава дека сериозен интерес за македонскиот репрезентативец пројавуваше Милан.